နှလုံးသားဆိုတာ လူ့ခန္ဓာ တစ်ခုလုံးရဲ့ နူးညံ့ သိမ်မွေ့ဆုံး အရာလို့ နားလည်ခဲ့တယ်။ အသက် ရှင်သန်ဖို့ သက်သက် မဟုတ်ဘဲ မြတ်နိုးစွာ ခံစားတတ်ဖို့ ဆောင်ရွက်တာလည်း သူ့တာဝန်ပါပဲ။
နှလုံးသား တစ်ခုကို ပိုင်ဆိုင် ထားကြသူတိုင်း သူ့ရဲ့ စေညွှန်ရာ အချစ် မွေးဖွားခြင်းကို တစ်ချိန်ချိန် တွေ့ထိ ခံစားဖူးကြမှာပါ။ ကျွန်တော်ကတော့ သူ့ရဲ့စေညွှန်ရာကို ပီပီပြင်ပြင် နာခံခဲ့ဖူးပါတယ်။ ကျွန်တော် အေးကို နင့်နင့်သည်းသည်း ချစ်ခဲ့ဖူးပါတယ်။ အဲဒီတုန်းက ကျွန်တော့်အသက် ၁၅၊ ၁၆ ပေါ့။ ကျွန်တော်က ကိုးတန်း။ သူက ရှစ်တန်း။ တစ်ရွာတည်း ဖြစ်ပြီး နှစ်မိုင်လောက် ဝေးတဲ့ ကျောင်းကြီးကို စက်ဘီးနဲ့ အသွားအပြန် တက်ကြရင်း သံယောဇဉ်တွေ တွယ်ခဲ့ကြတာပါ။
ကျောင်းသွား၊ ကျောင်းပြန် စက်ဘီး စီးရင်း စကား ပြောရတာတွေ၊ ထမင်းအတူ ၀ိုင်းဖွဲ့ စားရတာတွေ မိုးရွာထဲ အပူအပင်မဲ့ လမ်းလျှောက်ခဲ့ ရတာတွေဟာ အချစ်ကြိုးရဲ့ တုန်ခါမှု အစတွေပေါ့။ ဒါပေမယ့် ကျွန်တော် ဘယ်သူ့ရှေ့မှ မဖွင့် ဖြစ်ခဲ့ဘူး။ အဲဒီအချိန်က ဖွင့်ပြောဖို့ထက် အများ သိမှာကိုပဲ စိုးနေရတာပါ။ သူနဲ့ စကားပြောရင်လည်း သူ့မျက်ဝန်းဝိုင်းတွေကို
ဘယ်တော့မှ ရင်မဆိုင်ရဲခဲ့ဘူး။ ညအိပ်ရာထဲ ရောက်မှ တစ်ယောက်တည်း စိတ်ရှိ လက်ရှိ အုံ့ပုန်း ချစ်နေရတဲ့ အဖြစ်ပါ။ ဒီလိုနဲ့ သူ တက္ကသိုလ် ၀င်တန်း ဖြေပြီးတဲ့ နွေရာသီ တစ်နေ့မှာတော့ အနှစ်နှစ် အလလက မြိုသိပ်ခဲ့ ရတဲ့ အချစ်တွေကို သူ့ရှေ့ဖွင့်ဟဖြစ်ခဲ့တယ်။ အဲဒီနေ့က သူ ရန်ကုန်မှာ စက်ချုပ်သင်တန်း တက်ဖို့ ကျွန်တော့်ဆီလာ နှုတ်ဆက်တဲ့ နေ့ပါ။ မှတ်မှတ် ရရ အိမ်ရှေ့မန်ကျည်းပင် အောက်က ကွပ်ပျစ်လေးမှာ ထိုင်ရင်း စာဖတ်နေတုန်း ဖက် ဖူးရောင် ၀တ်စုံလေးနဲ့ သူ ရောက်လာတာ။
“ကိုခန့်၊ အေး ရန်ကုန် စက်ချုပ် သင်တန်း သွားတက်မလို့ လာနှုတ်ဆက်တာ”
သူပြောတော့ ငေးမော အံ့သြ မင်သက်မိရင်း သူ့ကို ကြည့်မိလိုက်တယ်။ အဲဒီတုန်းက နှလုံးခုန်သံကို အခု ထိ မှတ်မိနေသေးတယ်။ ရင်ထဲမှာ ဗလောင် ဆူနေလိုက် တာများ သဲသောင်ပြင်ပေါ်က ငါးတစ်ကောင်လိုပဲ ဖျပ်ဖျပ်ကို လူးလို့။ လည်ချောင်း ထဲလည်း အလုံးကြီး ဆို့ပြီး ဘာစကားမှ မပြောနိုင်ဘူး။ မျက်ရည်တွေသာ ဘယ်လိုဝဲ လာမှန်းမသိ။
ဘ၀မှာ နှလုံးသားရဲ့ စေ့ဆော်မှုကြောင့် ပထမဆုံး ဝေ့ခဲ့ရ မျက်ရည်မို့ ပြန်တွေးတိုင်း အမှတ်ရနေတယ်။ သူ ပြုံးပြီး ကြည့်နေစဉ်မှာပဲ ရင်ထဲက စကားတစ်ခွန်းကို ခက်ခက်ခဲခဲ ပြောဖြစ်ခဲ့တယ်။ တိတိကျကျ မမှတ်မိတော့ပေမယ့် “သိပ်ချစ်တယ်”ဆိုတဲ့ စကားကိုတော့ မှတ်မိနေဆဲပဲ။
ဘ၀မှာ အေးကို ပထမဆုံး ချစ်ခဲ့တာပါ။ နောက်ဆုံး အချစ်လို့လည်း ယုံကြည်ခဲ့တယ်။(အဲဒီ အချိန်ကပေါ့။) သူ ရန်ကုန်မှာ ရှိနေတဲ့ ကာလတွေဟာ ကျွန်တော့်အတွက် လောက ငရဲပါပဲ။ မစားနိုင်၊ မအိပ်နိုင်နဲ့ အချစ် ဒုက္ခရဲ့ ဝေဒနာကို အသေအချာ သိခဲ့ရတယ်။
အဝေးပြေးကားတွေ ၀င်လာတိုင်း သူပါမလား ဆိုတဲ့ မျှော်လင့်ချက်နဲ့ ပြေး ကြည့်ခဲ့ရတာလည်း နံနက် တိုင်းလိုလိုပါပဲ။ အမေ မေးရင် စောစောထပြီး လမ်း လျှောက်ကြည့်တာပါလို့ ဖြေတတ်ခဲ့တယ်။ မခိုင်လုံမှန်းသိ ပေမယ့် အမှန်အတိုင်း ၀န်ခံဖို့ မ၀ံ့ခဲ့ဘူး။
ဒီလိုနဲ့ပဲ တစ်ယောက် တည်း ကြိတ်လွမ်းခဲ့ရတယ်။ သူနဲ့အတူ လျှောက်ခဲ့တဲ့ လမ်းတွေကို ကြည့်ရင်း လွမ်းတယ်။ သူနဲ့အတူ ထိုင်ဖြစ်ခဲ့တဲ့ ကုက္ကိုပင် အောက်က ခုံတန်းပြာလေးကို မြင်လည်း လွမ်းတယ်။ အဲဒီ အချိန်တုန်းက ရင်ထဲမှာ အလွမ်းတွေ ဖွဲ့ သီနေတာမို့ အရာရာတိုင်းဟာ လွမ်းစရာတွေချည်းပါပဲ။
လွမ်းဆွတ်တမ်းတ ခြင်းရဲ့ အဆုံးစွန်မှာ သူ့ဆီ လိုက်သွားဖို့ အကြိမ်ကြိမ် ဆုံးဖြတ်ခဲ့ဖူးတယ်။ ဒါပေမယ့် ဘ၀နဲ့ဆန္ဒရဲ့ အားပြိုင်မှုကြားမှာ ကျွန်တော် ရှုံးခဲ့တယ်။ ဘ၀က စိတ်ကူးယဉ် ကဗျာ တစ်ပုဒ်လောက် ဖတ်ချင်စရာ မဖြစ်ခဲ့ဘူး။
စာတိုက်မရှိ၊ တယ်လီဖုန်း မရှိတဲ့ မိုင်ထောင်ချီရွာ လေးကပဲ သူ့ကိုလွမ်းရင်း အချိန်တွေကို ကျော်ဖြတ်ခဲ့တယ်။ အဲဒီတုန်းက ကျွန်တော့် အသက် ၁၈ နှစ်ပါ။
သူ ပြန်လာတဲ့နေ့ဟာ ဘ၀ရဲ့ ပျော်စရာ နေ့ထဲက အပျော်ရဆုံး တစ်နေ့အဖြစ် ဘ၀ စာမျက်နှာမှာ မှတ်တမ်း တင်နိုင်ခဲ့တယ်။ သူပြန်လာပြီး မကြာခင်ပဲ ငတ်မွတ် တမ်းတခဲ့တဲ့ သူ့ချစ် မေတ္တာကို ရရှိ ပိုင်ဆိုင်ခဲ့တယ်။ အဲဒီ အချိန်ကတော့ ဘ၀မှာ အရာရာ ပြည့်စုံသွားပြီလို့ကို ထင် မိခဲ့တာပါ။ ဒါပေမယ့် ကျွန်တော့် အထင်ဟာ မှား ယွင်းမှု တစ်ခုသာ ဖြစ်ခဲ့ပါ တယ်။
အေးနဲ့ ချစ်သူဖြစ်ပြီး ၃ နှစ်တာ ကာလကို ကျော်ဖြတ် ခဲ့ကြတယ်။ “ကြာလေလေ၊ ခိုင်မြဲလေလေ” ဆိုတဲ့ စကား ဟာ ကျွန်တော့် အတွက်တော့ ဟာသပါပဲ။ နှစ်တွေ ကြာလာလေ စိတ်ခံစားမှု အေးခဲလာလေမို့ ကိုယ့်ဘာသာ အံ့သြခဲ့ရတယ်။
အချစ်ဆိုတာ ပင်လယ် ကမ်းခြေက ခရုကောက် သလိုပဲဆိုတဲ့ စကားကို အဲဒီ ကတည်းက ကျွန်တော် လက်ခံ ဖြစ်ခဲ့တာပါ။ကျွန်တော့်ဘ၀ ကမ်းခြေတစ်လျှောက် ခရုလှလှလေးတွေ ထပ်တွေ့ လာတဲ့အခါ လက်ထဲ ကောက်မိခဲ့တဲ့ ခရုလေးကို လွှတ်ချဖြစ်ခဲ့တယ်။
ရက်စက်ရာ၊ သစ္စာမဲ့ရာ ရောက်ခဲ့ပေမယ့် ကိုယ့်ဆန္ဒသာ ရှေ့တန်းတင်ဖြစ်ခဲ့တဲ့ အတ္တသမား တစ်ယောက်မှာ ကျူးလွန်ခဲ့တဲ့ အမှားအတွက် နောင်တဆိုတာ မရှိခဲ့ဘူး။ နောက်ခရုလေးရှေ့မှာ
“ဖြူ့ကို အရမ်းချစ် တယ်ကွာ”
လို့ ပြောမိတဲ့ စကား အတွက်လည်း ကိုယ့်ဘာသာ လိပ်ပြာသန့်တယ်။ တကယ်လည်း ချစ်ခဲ့တာကိုး။ (ကျွန် တော်ထင်တာလည်း ဖြစ်နိုင် ပါတယ်။)
ဖြူက ကျွန်တော့်ကို ကြည့်ရင်း ပြုံးတယ်။ သူ့ အပြုံးရဲ့ အဓိပ္ပာယ်ကို မသိပေမယ့် ရင်တစ်ခုလုံး တုန်ယင် လှိုက်မောပြီး တလှပ်လှပ်ဖြစ်ခဲ့ရတယ်။ အဲဒီအပြုံးလေး တွေကိုပဲ တမြတ်တနိုး ကောက်ချင်ခဲ့တဲ့ ကာလပေါ့။ အဲဒီ အချိန်က ကျွန်တော့် အသက် ၂၂ နှစ်။ ဆယ်ကျော်သက် မဟုတ်လို့ ရင်ခုန် လှိုက်မောစရာ မကောင်းဘူးဆိုရင် ကျွန်တော် အဲဒီအဆို ငြင်းချင်ပါတယ်။ ကျွန်တော့် ရင်ခုန်မှုက ပထမဆုံး အေးရဲ့ အဖြေကို ရစဉ်တုန်းက အတိုင်းပါပဲ။ သေချာ စဉ်းစားကြည့်ရင် ဒီ တစ်ခါ ရင်ခုန်မှုက ပိုပြီး သစ်လွင်သလိုတောင် ခံစားရတယ်။
ဖြူ့အဖြေကို ရပုံက လည်း အတော်ပဟေဠိဆန် နေတာကိုး။ ဖြူက ကျွန်တော့်လို စာရေး၊ စာဖတ် ၀ါသနာပါ တယ်။ အိမ်မှာ အချိန်ရတိုင်း ကျွန်တော် ရှိနေတဲ့ စာကြည့် တိုက်လေးကို စာလာဖတ်လေ့ ရှိတယ်။ ဖြူက ဒီနယ် သားမဟုတ်ဘူး။ တစ်နယ်က ပြောင်းလာကြတာပါ။
စာပေကို အရင်းခံပြီး ကျွန်တော်တို့ ရင်းနှီးခဲ့ကြတယ်။ ဖတ်ပြီးသား စာအုပ်တွေကို ဝေဖန်ကြတယ်။ ဆွေးနွေးကြတယ်။ တစ်ခါ တစ်ရံ အယူအဆချင်းတွေ ထိပ်တိုက်တွေ့ပြီး သီအိုရီတွေကို ငြင်းခုန်ဖြစ်ကြတယ်။ ဒီလိုနဲ့ပဲ ကျွန်တော့် ရင်ထဲ သူရောက်လာတယ်။ ဒါပေမယ့် အချိန်တော်တော်ကြာ သိမ်းထားဖြစ်ပါသေး တယ်။ နောက်မှ ရင်ထဲက စကားတွေကို သူ့ရှေ့ဖွင့်ဖြစ်လိုက်တယ်။ မှတ်မှတ်ရရ အဲဒီနေ့က စာကြည့်တိုက်မှာ သူနဲ့ကျွန်တော်ကလွဲပြီး ဘယ်သူမှ ရှိမနေဘူး။ ကျွန်တော် ပြောခဲ့သမျှ စကားလုံးတိုင်းကို မမှတ်မိတော့ပေမယ့် “ဖြူ့ကို အရမ်း ချစ်တယ်ကွာ” ဆိုတဲ့ စကားလေးတော့ အခုထိ မှတ်မိနေပါသေးတယ်။
ဖြူ့ကို ချစ်ခွန်း သီပြီးတဲ့ နောက် သူ ကျွန်တော့်အပေါ် ခပ်တန်းတန်း ဖြစ်သွားတယ်။ အရင်လို စာကြည့်တိုက်ကို အားတဲ့ အချိန်တိုင်း မလာတော့ဘူး။ လာရင်လည်း စကားပြော နည်းပြီး မျက်နှာထားကြီး တင်းနေတယ်။ ကျွန်တော် စကားခေါ် ရင်လည်း မေးတစ်ခွန်း၊ ဖြေတစ်ခွန်းပဲ။ စာအုပ် အကြောင်းလည်း မပြောတော့ဘူး။ စာအုပ် ငှားပြီးရင်လည်း ချက် ချင်းပြန်တယ်။
ကျွန်တော့်ကိုလည်း အကြောင်း မပြန်ဘူး။ သုံးလေးကြိမ်လောက် ကျွန်တော် နားပူသေးတယ်။ သူက ပုံမှန် ပဲ။ကြာလာတော့ ကျွန်တော် စိတ်ပျက်လာတယ်။ စိတ်ရဲ့ ကျက်စားရာ စာပေကလည်း ရှိနေတာမို့ ဒီဘက်ကိုလျှော့ပြီး အရင် အတိုင်းပဲ နေဖြစ်လိုက်တယ်။ အဲဒီကျမှ သူကလည်း အရင်အတိုင်း ပြန်ဖြစ်လာတာလေ။ ဖြူ့ကိုကြည့်ပြီး မိန်းကလေးတွေရဲ့ သဘာဝကို တီးခေါက်မိသလို ဖြစ်ခဲ့တယ်။
ဖြူ့ကို ရင်ဖွင့်ပြီး သူ့ဆီက တုံ့ပြန်လာမယ့် အဖြေကို ရဖို့ နေ့ရောညရော ကျွန်တော် ကြိုးစားခဲ့တာပါ။ ဒါပေမယ့် အရာ မထင်ခဲ့ဘူး။ သူက တင်းလို့ ကျွန်တော်လက် လျှော့သလို လုပ်ပြီး ဘာသာ နေတော့မှ သူကတစ်ခါ ပြန် ၀ဲလာတယ်။
အဲဒီကတည်းကပဲ ဆိုပါတော့။ “ချစ်သူတစ်ယောက် ရဖို့ဆိုရင် စွန်လွှတ် ကျွမ်းရမယ်”ဆိုတဲ့ စကားလေးကို ကျွန်တော် လက်ခံ ဖြစ်ခဲ့တာလေ။ ဖြူ ကျွန်တော့်ကို အဖြေ ပေးပုံကလည်း အတော် ကဗျာဆန်ပါတယ်။
မှတ်မှတ်ရရ၊ အဲဒီနေ့ ကျွန်တော် မြို့ကို စာမူလာ ထည့်ဖို့ ဆိုင်ကယ်လေး သနေစဉ်ပဲ သူရောက်လာတာ။ အရင်နေ့ကတော့ ကျွန်တော် စာမူသွားထည့်မယ့် အကြောင်း ပြောပြီး ထည့်စရာရှိရင် အဆင်သင့် လုပ်ပြီး လာပေးဖို့ မှာထားတာပါ။
(ကျွန်တော်တို့ဒေသက စာတိုက်နဲ့ ဝေးတာမို့ စာမူ ထည့်ရင် အခုလို တကူးတက သွားထည့်ရမှ ရောက် တာပါ။ မဟုတ်ရင် စာမူတစ် ပုဒ်တိုက်ကို ရောက်ဖို့ဆိုတာ ဒုလ္လဘ တစ်ခုလို ခက်တယ်။ ဒါကြောင့် ၀ါသနာတူချင်း ကိုယ်ချင်းစာတဲ့အနေနဲ့ သူ့ စာမူကို ကျွန်တော် ယူသွားပေးဖို့ ပြောခဲ့တာပါ။)
မနက်မှာ စာအိတ် ၂ အိတ်ကိုင်ပြီး သူရောက်လာတယ်။ ကျွန်တော်က ပုံမှန်ပါ ပဲ။ သူ့ကိုတစ်ချက် ငဲ့ကြည့် တော့ ၀င်းဖန့်ဖန့် အပြုံး တစ်ပွင့်ကို မြင်ရတယ်။ ရင်တစ်ခုလုံး ဒိန်းခနဲ ဆောင့်ခုန်သွား တာပဲ။ သူ့မျက်နှာမှာ ဒီအပြုံး မမြင်ရတာ ကြာပြီလေ။ ကျွန်တော် လှုပ်လှုပ်ရှားဖြစ် နေစဉ်မှာပဲ
“ကိုခန့်၊ ဒါက ဖြူထည့် နေကျ မဂ္ဂဇင်းတိုက်ကိုနော်”
စာအိတ်တစ်အိတ် ကမ်းပေးတယ်။ ကျွန်တော် လှမ်းယူလိုက်စဉ်ပဲ နောက် တစ်အိတ် ထပ်ပေးတယ်။
“ဒါကတော့ ဖြူ့ဘ၀ မှာ တစ်ခါမှ မပို့ဖြစ်သေးတဲ့ မဂ္ဂဇင်းတိုက်ပဲ ဆိုပါတော့။ တစ်ခါမှ မပို့ရသေးတော့ ရင် လည်းခုန်တယ်။ အဲဒါ ကိုခန့်ပဲ စစ်ပြီး ထည့်ခဲ့ပေါ့”
ပြောပြီး သူပြေးထွက်သွားတယ်။ ကျွန်တော့် လက်ထဲမှာ စာအိတ်လေးက ပွင့် လျက်သား။ “ကိုခန့် စစ်ပြီးမှ ထည့်”လို့ သူခွင့် ပေးထားခဲ့တာမို့ အထဲက စာရွက်လေးကို ထုတ်ဖြစ်လိုက်တယ်။
မင်သက် အံ့သြ၊ ၀မ်းသာ။ ခံစားမှုအစုံပဲ။ ရင်တစ်ခုလုံး ဘောင်ဘင်ခတ် သွားတယ်။ ပန်းရောင်စာ ရွက်လေးမှာ သူရေးထားတာ စာလေး တစ်ကြောင်းတည်း။
“ဖြူ့နှလုံးသားက အစ်ကို့ အချစ်ဆောင်းမှာ ခိုက်ခိုက်တုန် ချမ်းခဲ့တာပါ”တဲ့။
ဖြူနဲ့ကျွန်တော် ချစ်သူဘ၀ ရောက်ခဲ့ကြတယ်။ စဉ်းစားကြည့်ရင် ၀ါသနာတူ၊ ရည်ရွယ်ချက် တူကြသူတွေမို့ ပျော်စရာပဲလို့ ထင်စရာပေါ့။ ဒါပေမယ့် ကျွန်တော် မပျော်ဖြစ်ဘူး။ ဘာကြောင့်လို့လည်း နားမလည်ဘူး။ ဖြူနဲ့ချစ်သူ ဖြစ်ပြီး တစ်နှစ်ကျော်လောက်မှာပဲ လမ်းခွဲဖြစ်ခဲ့ကြတယ်။ ကျွန်တော်တို့ ချစ်သူတွေ ဖြစ်ခဲ့တာ ၀တ္ထု ဆန်ခဲ့သလို လမ်းခွဲတော့လည်း ၀တ္ထုဆန် ဆန်ပါပဲ။ နှစ်ဦးသား သဘော မတိုက်ဆိုင်ပါသဖြင့် ဆိုတဲ့ စကားလေးနဲ့ ပွဲသိမ်းနိုင်ခဲ့ပါ တယ်။ ဒုတိယမြောက် ချစ်သူနဲ့ လမ်းခွဲခြင်းဟာ ကျွန်တော့် အတွက် ပီကေ၀ါးသလောက် ပါပဲ။
အဲဒီတုန်းက ကျွန်တော့် အသက် ၂၅ နှစ်ပါ။ ချစ်သူနှစ်ယောက်နဲ့ လမ်းခွဲပြီး ၂၅ ဆိုတဲ့ အရွယ်ဟာ စာမျက်နှာပေါ်ဖြတ်သန်း ဖို့ သင့်တင့်တဲ့ အရွယ်ပါ။ ကျွန်တော့် ၀တ္ထုတွေ စာမျက် နှာပေါ် မြင်လာရတဲ့ အခါ ချစ်သူတစ်ယောက် ရခြင်း ထက် ပိုပျော်ဖြစ်ခဲ့ပါတယ်။
ဒီလိုနဲ့ ခရုကောက်တမ်း ကစားရတာ ၀ါသနာ ပါလာတယ်။ ခရုလေးတွေ ကောက် ပြီး ပြန်လွှတ်ရတာ ဘယ် ခံစားမှုနဲ့မှ မတူဘူး။ ခရုလေးတွေ ကောက်ရင်း၊ လွှတ်ရင်းနဲ့ပဲ ဘ၀ရဲ့ နောက်ဆုံး ခရုလေးကို တွေ့ခဲ့ရတယ် ဆိုပါတော့။ အဲဒီတုန်း က ကျွန်တော့်အသက် ၃၅ ပါ။ နောက်ဆုံး တွေ့ခဲ့တဲ့ ခရု လေးမို့ အခုထိ မှတ်မိနေတယ်။ အမှတ်ရစေတွေ ကလည်း ဖြစ်ခဲ့ရတာကိုး။
သူ့နာမည်က ဖူးဖူးခိုင်တဲ့။ တစ်အိမ်လုံးက ဖူးဖူးလို့ ခေါ်ကြတယ်။ သူဘယ်ကမှန်း ကျွန်တော် သေချာမသိပါ ဘူး။ ရန်ကုန်က အေးတို့ အိမ်ကို အလည်လာတဲ့ အေးတို့ အမျိုးဆိုတာပဲ သိတယ်။ အသက်ကတော့ ခပ်ငယ်ငယ်ပါ။ ၁၇၊ ၁၈ လောက်ပဲရှိမယ်။ ရန်ကုန်သူ ဆိုတော့ သိတဲ့အတိုင်း ပြောတာ ဆိုတာကအစ သွက်တယ်။ ပြင်တာဆင်တာက စမတ်ကျတယ်။ သူ့အကျင့် တစ်ခုက အမြဲတမ်း ပီကေ၀ါး နေတတ်တာပဲ။
ပီကေတော့ အတော် ကြိုက်ပုံရတယ်။ သူ့ကို ဘယ်အချိန်ကြည့်ကြည့် ပါးစပ်ထဲမှာ ပီကေတစ်ခု အမြဲ ၀ါးနေတတ်တာချည်းပဲ။ ကောင်မလေးချောချော ဆိုရင် သဘော ကျတတ်တဲ့ ကျွန်တော့် ၀ါသနာ အတိုင်း သူ့ကိုလည်း သဘော ကျသွားတယ်။ နွားအို မြက်နုကြိုက်လို့ ပြောပြော၊ အမဲရိုးက ဟင်းအိုးနဲ့ မတန်လို့ဆိုဆို သဘောကျ တာတော့ အမှန်ပဲ။ ဒါကြောင့် သူ့နဲ့ ရင်းနှီးဖို့ ကြိုးစားဖြစ်တယ်။ ရန်ကုန်သူ ဆိုတော့ သူနဲ့ ရင်းနှီးဖို့ ကြိုးစားရတာ လွယ်ပါတယ်။ ခက်တာက ကျွန်တော့် ပထမဦးဆုံး ချစ်သူ အေးတို့အိမ်မှာ ရောက်နေတာ တစ်ခုပဲ။ ကျွန်တော့် အကြောင်းကို အေးက တစ်ဆင့် သူသိနေမှာ သေချာပါတယ်။ ဒါပေမယ့် ကိစ္စတော့ မရှိပါဘူး။ သူနဲ့ရင်းနှီးပြီး အကောင်းဆုံးအခွင့်အရေးရတဲ့ အချိန်မှာ သူ့ကိုရင်ဖွင့်ဖို့ စိတ် ကူးဖြစ်တယ်။ အမြဲတမ်း ကြံစည် ကြိုးစားနေသူ အတွက် အခွင့်အရေးကလည်း သိပ် တော့မရှားပါဘူး။
အဲဒီနေ့က သူရွာဦး စေတီမှာ ပန်းတွေလှူပြီး ကုက္ကိုပင်ကြီး အောက်က ခုံ တန်းပြာလေးမှာ ထိုင်နေတာ ပါ။ ကျွန်တော် သူ့ဆီသွားတော့ အပြုံးနဲ့ကြိုတယ်။ ဒီအပြုံးက ကျွန်တော့် လည်ပင်းကို စွပ်မယ့်ကြိုးမှန်း မသိခဲ့ဘူး။ အဲဒီတုန်းက ကျွန်တော့် စကားကို ငံ့လင့်နေတဲ့ အပြုံးလို့ မှားယွင်းစွာ ထင်ခဲ့မိပါ တယ်။ အဲဒီအထင်နဲ့ပဲ “ဖူးဖူး ကို သိပ်ချစ်တယ်”လို့ ဖွင့် ပြောဖြစ်ခဲ့တာပါ။
ကျွန်တော့်စကား ကြား လိုက်တာနဲ့ ထိပ်ပုတ်ခံလိုက် ရတဲ့ မြွေဟောက်တစ်ကောင် လို ရှူးခနဲ သူထရပ်လိုက် တယ်။ ပြီးတော့ စိမ်းစိမ်းကြီး ကြည့်တယ်။ မိန်းကလေး တစ်ယောက်ရဲ့ အကြည့် စူးစူးကြောင့် အတိုင်းအဆ မရှိ ကြောက်ခဲ့ရတာ အဲဒီအချိန် ပထမဆုံးပဲ။
“ရှင် ဘာစကား ပြောတာလဲ။ ရှင်ခြွေတိုင်း ကြွေမယ့် မိန်းကလေးတွေထဲမှာ ကျွန်မ မပါဘူး”
ဖြန်း
“မမအေးရဲ့ အချစ်ကို သစ်စိမ်းချိုးခဲ့တဲ့ အတွက်”
ဖြန်း
“ကိုယ့်နှမ အရွယ်လေးကို မစာမနာ စော်ကားတဲ့ အတွက်”
ပါးပြင်နှစ်ဖက်ကို အမှတ်တမဲ့ စမ်းဖြစ်လိုက်တယ်။ ကြာတော့လည်း ကြာခဲ့ပါပြီ။ အသက် ၄၀ ကျော်ခဲ့ပြီဆိုတော့ ဒီအဖြစ် အပျက်လေးဟာ ဆယ်စုနှစ် နီးပါးကြာခဲ့ပါပြီ။ ဒါပေမယ့် ပြန်တွေးတိုင်း အမှတ်ရနေတယ်။ အဲဒီကတည်းက ကျွန်တော့် နှလုံးသားဟာ အသက် ရှင်သန်ဖို့ တာဝန် တစ်ခုပဲ ထမ်းဆောင်ပါတော့တယ်။ အချစ်အတွက် နှလုံးသားရဲ့ ခံစားမှုဆိုတာ မရှိတော့ဘူး။ ကောင်မလေးတွေကိုလည်း အဝေးက ရှောင်ဖြစ်ခဲ့တယ်။ အထူးသဖြင့် ပီကေ ကြိုက်တဲ့ ကောင်မလေးတွေ ကိုပေါ့။
Written by နော်၊ကျောက်တိုင်၊
အားလုံးကိုချစ်ခင်လေးစားလျှက်...
YKKM
